Wednesday, November 4, 2009

நாசமத்துப்போற மக்கா....நல்ல தமிழ் மறக்காதீங்க...

அம்மா, இன்னிக்கு என்ன டே?

வியாழக்கிழமை...

அப்டின்னா?

வெள்ளிக்கிழமைக்கு முன்னாடி வருமே அது...

time-table எடுத்துவைக்கணும்...சரியாச் சொல்லும்மா...

வெள்ளிக்கிழமைன்னா friday..அப்ப, இன்னிக்கு thursday,வியாழக்கிழமை...

thursday ன்னு முதல்லயே தெளிவாச் சொல்லவேண்டியதுதானே?

முகத்தைக் கோணலாக்கிச் சொல்கிறது வாண்டு...

இப்படியே இங்கேயிருந்துகிட்டு, வீட்டில தமிழ்லதான் பேசணும்னு எங்ககிட்ட சொல்றமாதிரி, தமிழ்நாட்டுல போய் சொல்லிப்பாருங்க...அப்புறம் என்னதான் பாஸ்போர்ட்டைக் காட்டினாக்கூட நீங்க துபாய்லதான் இருக்கிறீங்கன்னு நம்பமாட்டாங்க யாரும். பிள்ளை சிரித்துக்கொண்டே சொன்னாலும் நிஜம் சுடத்தான் செய்தது.

"வங்கிக்குப் போகணும், தானி ஒண்ணு கூட்டிக்கொண்டுவா" ன்னு சொன்னா, தமிழ்நாட்டுக்காரங்களே ஏதோ கீழ்ப்பாக்கத்து உருப்படியோன்னு சந்தேகமாத்தான் பார்ப்பாங்க.

அடுக்குப்பானையும் குதிருமா அழகா செம்மண் காவிபூசி, திண்ணையும் தூணுமா இருந்த கிராமத்துவீடுகளும், மாமம்மா பேசிய அழகு தமிழும்கூட இன்று மாறித்தான் போய்விட்டது.டவுண்பஸ்,லேட்டு,லெட்டர்,ஸ்டேஷன்,ஸ்பீக்கர்செட்டுன்னு அடுக்கடுக்கா ஆங்கிலத்தில் பேச ஆரம்பிச்சுட்டாங்க நம்மாளுங்க.

குதிருன்னு சொன்னதும் நம்ம ஊர்ப் பழமொழி ஒண்ணு நினைவுக்கு வந்திருக்குமே... இடம் பொருள் அறியாமல் ஏதாவது உளறிக்கொட்டும்போது, "எங்கப்பன் குதிருக்குள்ள இல்லே"ங்கிற மாதிரி இப்படியா பேசுறதுன்னு கடிஞ்சுக்குவாங்க பெரியவங்க.

குதிர், நெல்லைச் சேமித்துவைக்க அந்நாளைய வீடுகளில் ஆளுயரத்துக்கு அமைக்கப்பட்டிருக்கும் மண்பாண்டங்களின் பெயராகும். இதைக் குலுக்கை என்றும்கூடச் சொல்லுவாங்க.

குதிரிலில் சேமித்த நெல்லை எடுத்து,பெரிய பெரிய குத்துப்போணிகளில்,புழுங்க வச்சு, தட்டடியில கொட்டி, வரிவரியா கிண்டிக் காயவச்சு, பறவைகள் கொத்தாமலிருக்க பிள்ளைகளைக் காவல் வைக்க,

அக்கம்பக்கத்துப் பிள்ளைகளெல்லாம் ஒன்றாகச் சேர்ந்துகொண்டு,

மழ வருது மழ வருது நெல்லள்ளுங்க
முக்காப்படி அரிசிபோட்டு முறுக்கு சுடுங்க
தஞ்சாவூரு மாமனுக்குக் கொஞ்சம் குடுங்க
சும்மா வார மாமனுக்குச் சூடுபோடுங்க

என்று கூடிப்பாடிக் குதூகலித்ததாக மாமம்மா கதை சொல்ல,விழிகள் விரியக் கேட்டுக்கொண்டிருந்ததுண்டு.மாமனின் அம்மா மாமம்மா, அம்மாவுடன் பிறந்த சகோதரன் அம்மாமன். எத்தனை அருமையான உறவுப்பெயர்களை மறந்துவிட்டோம்?...

வெள்ளென எழுந்திருச்சி, செம்பு நெறைய நீத்துப்பாவத்தைக் குடிச்சிட்டு,வயலுக்குப்போயி வேர்க்க விறுவிறுக்க கமலையில தண்ணியெறச்சு வயலுக்குப் பாய்ச்சிட்டு,வீட்டுக்குவந்து, கும்பா நிறைய பழைய சோறும் கருவாட்டுக்குழம்பும் சாப்பிட்ட அந்தக்கால மக்களின் உடலுரம் எங்கே,நாமெல்லாம் எங்கே!

வெள்ளென என்ற வார்த்தையை, விடியலில், அதிகாலையில் என்ற பொருளில் இன்னும் உபயோகிப்பார்கள்.நீராகாரத்தை நீத்துப்பாவம் என்று சொல்லுவதைச் நெல்லை மாவட்ட முதியவர்களிடம் இன்னும் கேட்கலாம்.கமலை என்பது மாடுகளை வைத்துக் கிணறுகளில் நீரிறைக்கும் முறை.

கும்பா, வட்டில் இரண்டும் அந்தக்காலத்து உணவு உண்ணும் பாத்திரங்களின் பெயர்களாம். கும்பா என்பது கிட்டத்தட்ட நம் சந்தனக் கிண்ணம் போலப் பெரியதாக இருக்குமாம்.நீருடன் உண்ணும் பழையசாதம் போன்றவற்றை உண்ண ஏற்றதாக இருக்குமாம். வட்டில் என்பது, தட்டுப்போல இன்னும் கொஞ்சம் உயரமான விளிம்புடன் வேலைப்பாடுகளுடன் கூடியதாய் இருக்குமென்று கூறக்கேட்டிருக்கிறேன்.

வைக்கப்படப்புல வாழக்கா பழுக்கவச்சு, கொச்சக்கயித்தில மட்டைவச்சு ஊஞ்சல்கட்டி, கருக்கலானதுகூடத் தெரியாம கூட்டாளிகளோட விளையாடிட்டு வீட்டுக்குவந்தா, அம்மா சட்டகப்பையை அடுப்பில வச்சு, சூடுவைப்பேனென்று சுத்திவர, ஆச்சியோட மடியில் அடைக்கலம் புகுந்து...நம் தமிழ்க் குடும்பங்களில்தான் நினைத்து ரசிக்க எத்தனை எத்தனை விஷயங்கள்...

வைக்கப்படப்பு- வைக்கோல் சேமித்து வைக்கும் இடம்

கொச்சக்கயிறு _ தென்னை நாரினால் பின்னிய கயிறு

சட்டகப்பை - தோசை திருப்பும் கரண்டி

கருக்கல் - மாலை மயங்கிய வேளை

ஆச்சி - அப்பாவின் அம்மா.

இப்படி, மறந்தும் மறைந்தும்போன வார்த்தைகளும், வாழ்க்கைமுறைகளும் எத்தனை எத்தனையோ...

கடைசியா, தலைப்புக்கு வருவோம்...

அன்றைய நெல்லை மாவட்டப் பகுதிகளில், வசவுச்சொற்கள் பல வழக்கில் இருந்தாலும் ரொம்பவும் வித்தியாசமாக, நாசமத்துப் போறவனே/வளே என்ற வார்த்தை என்னை மிகவும் கவந்ததுண்டு. நாசமாய்ப்போ என்று சபிப்பதை விடுத்து, நாசம் + அற்றுப் போ, அதாவது "அழிவில்லாமல் இரு" என்று சபிப்பதுபோல வாழ்த்துவது இந்த வார்த்தை. எத்தனை அருமையான நாகரிகம் பாருங்கள்...

ஆக, நாசமத்துப்போற மக்கா, மறந்துபோன நல்லதெல்லாம் மறுபடியும் நினைவில்கொண்டு நல்லதமிழை எல்லாரும் பேசிடுவோம்.

(இது ஒரு மீள் மீள்பதிவு...)

11 comments:

  1. அருமையான தமிழை மறக்காதீங்கன்னு தலையில் தட்டும் பதிவு!!

    ReplyDelete
  2. நன்றிகள் கலையரசன்!

    ReplyDelete
  3. அருமை

    இன்னும் இது மாதிரி இடுகையை எழுத வேண்டுகின்றேன்.

    கிராமத்துச் சொற்களை அறிந்து கொள்ள ஏதுவாகும்

    அன்புடன்
    திகழ்

    ReplyDelete
  4. நல்ல பதிவு
    வாழ்த்துக்கள் மேலும் இது போன்ற பதிவுகளை எழுத

    -கத்திவாக்கம் NSK

    ReplyDelete
  5. //மழ வருது மழ வருது நெல்லள்ளுங்க
    முக்காப்படி அரிசிபோட்டு முறுக்கு சுடுங்க
    தஞ்சாவூரு மாமனுக்குக் கொஞ்சம் குடுங்க
    சும்மா வார மாமனுக்குச் சூடுபோடுங்க//

    சின்ன வயசுல பாடினது ஞாபகத்துக்கு வருது.... நன்றிங்க...

    பிரபாகர்.

    ReplyDelete
  6. //அருமை

    இன்னும் இது மாதிரி இடுகையை எழுத வேண்டுகின்றேன்.

    கிராமத்துச் சொற்களை அறிந்து கொள்ள ஏதுவாகும்//

    விரைவில் எழுத முயற்சிக்கிறேன் திகழ்.

    ( இது உங்களைத் தொடர்ந்து நான் எழுதிய தொடர் பதிவு தானே...)

    ReplyDelete
  7. //நல்ல பதிவு
    வாழ்த்துக்கள் மேலும் இது போன்ற பதிவுகளை எழுத

    -கத்திவாக்கம் NSK//

    வருகைக்கும் வாழ்த்துக்களுக்கும் நன்றி NSK!

    ReplyDelete
  8. //சின்ன வயசுல பாடினது ஞாபகத்துக்கு வருது.... நன்றிங்க...

    பிரபாகர்.//

    உங்களுக்கும் என் நன்றிகள் பிரபாகர்!

    ReplyDelete
  9. ( இது உங்களைத் தொடர்ந்து நான் எழுதிய தொடர் பதிவு தானே...)

    இடுகையைப் படித்த உடனே நினைவிற்கு வந்தது.அது மட்டுமல்ல மீள்பதிவு என்பதையும் படித்தேன். இருந்தும் தங்களின் மூலம் பல்வேறு நெல்லை வட்டாரச்சொற்களை அறிந்து கொண்டு வாழ்வியலில் பயன்படுத்த விரும்பியே அவ்வண்ணம் கருத்துரை இட்டேன்.

    /
    விரைவில் எழுத முயற்சிக்கிறேன் திகழ்./

    தங்களின் வட்டாரச்சொற்கள் தொடர்பான இடுகை எதிர் நோக்கி ஆவலுடன் உள்ளேன்.

    அன்புடன்
    திகழ்

    ReplyDelete
  10. ஐ! நீங்களும் நெல்லை சீமையா? "கருக்கல்ல வெளிய போவாத" என்று எங்க கன்மா (அம்மா vazhi பாட்டி) adikkadi solluvaanga.. kumba kooda kelvi patruken

    ReplyDelete
  11. aahaa..... namma vooru varthai ellam ketkum pothu.... enna santhosam manasula. neenga thirunelveli-a?? bt i think nw a days voorla kooda ipdi ellam pesarala.... theriyala... neenga entha voornu therinchukalamnu unga profile pona... dubai nu irku :-)

    ReplyDelete

LinkWithin

Related Posts with Thumbnails