Sunday, November 29, 2009

சம்பளம்!

"கொஞ்சமாச்சும் என்ன நிம்மதியா இருக்கவிடுங்களேன்..." எரிச்சலுடன் சொல்லிவிட்டு எச்சில் பாத்திரங்களை எடுத்துக்கொண்டு அடுப்படிக்குப் போனாள் செல்வி.

"அடேங்கப்பா, ராசாமவளுக்கு எவ்ளோ கோவம் வருது... புருஷங்காரன் கஷ்டம்னுசொல்லி காசுகேட்டா பொண்டாட்டிக்காரி தலைய அடகுவச்சாவது குடுக்கத்தெரியணும்டி...அத விட்டுட்டு அம்மாளுக்கு சந்தோஷம் போச்சாம்...நிம்மதிபோச்சாம்.... என்னத்தக் கொண்டுவாறாள்களோ இல்லையோ அப்பன் வீட்லருந்து இந்த அழுகைய மட்டும் மறக்காம கொண்டுவந்திர்றாளுக.."

உள்ளே போன போதை உசுப்பேத்திவிட்டிருக்க, உரக்கக் கத்திக்கொண்டிருந்தான் கதிரேசன்.

பதில்சொல்லத்தோன்றாமல் பாத்திரங்களை விளக்கிக்கொண்டிருந்தாள் செல்வி.

திடீரென்று, "டேய் மவனே, அந்த சிலேட்டைக் கொண்டாடா..."

என்று குரல்கொடுத்தான் கதிரேசன்.

அம்மாவோட அழுகையையும் அப்பனோட கத்தலையும் மௌனமாக உள்வாங்கியபடி, எழுதுவதுமாதிரி உட்கார்ந்திருந்த மகன் செந்தில், எழுந்துவந்து சிலேட்டை அப்பாவிடம் கொடுத்தான்.

கொடுத்த சிலேட்டில் "நிம்மதி, சந்தோஷம்" என்று தன் போதையில் நடுங்கும் விரல்களால் கோழிகிறுக்கியதுமாதிரி எழுதிவிட்டு,

"இந்தாடி, நீ கேட்ட நிம்மதியும் சந்தோஷமும்...தலைக்குமாட்டுல வச்சுட்டுத் தூங்கு"

என்றுசொல்லி, ஏளனமாய்ச் சிரித்தபடி சிலேட்டை அவளிடம் விட்டெறிந்தான் அவன். கோபம் பெருகினாலும் அதைச் செலவழிக்க இது தகுந்த சமயம் இல்லையென நினைத்தவளாக அதை மனதில் அழுத்தினாள் செல்வி.  அழுத்தப்பட்ட ஆத்திரம் கண்ணீராக வெளிப்பட்டது.

சேலைத்தலைப்பால் கண்ணீரைத்துடைத்தவள், அதே ஈரத்தில் சிலேட்டையும் சுத்தமாகத் துடைத்து மகனின் பைக்கட்டில் வைத்துவிட்டு மகனைக்கூட்டிக்கொண்டுபோய் பாயில் படுக்கவைத்துவிட்டுத் தானும் படுத்த்டுக்கொண்டாள்.

.............................................

மாலை பள்ளிக்கூடத்தைவிட்டு செல்வி மகனுடன் வெளியே வந்தபோது வாசலிலேயே நின்றான் கதிரேசன்.

" சம்பளம் வாங்கியிருப்பேல்ல, பணத்தைக்குடு...அடிக்குரலில் அதட்டினான் அவன்.

பதில் பேசாமல் பையிலிருந்த கவரை எடுத்து அவன் கையில் கொடுத்துவிட்டு, மகனைக் கையில் பிடித்தபடி வேகமாக நடந்தாள் அவள்.

என்னடி, கவர் மெலிஞ்சுபோயிருக்கு என்று குரல்கொடுத்தபடி, கவரைப்பிரித்தான் கதிரேசன். கேள்வி எட்டாத தூரத்துக்குச் சென்றிருந்தாள் அவள்.

கவருக்குள் எட்டாக மடித்த காகிதம் இருந்தது. "காசை எதுக்கு காகிதத்தில் மடிச்சுவச்சிருக்கா,கழுத..." என்று நினைத்தபடி காகிதத்தைப் பிரித்தான் அவன்....

உள்ளே "சம்பளம்" என்ற வார்த்தை தடித்த எழுத்துக்களில் எழுதப்பட்டிருந்தது. திகைத்தவனாக,பேப்பரைத் திருப்பிப் பின்னால் பார்த்தான். அங்கேயும் அதே வார்த்தை அவனைப்பார்த்துச் சிரித்துக்கொண்டிருந்தது.

3 comments:

  1. //உள்ளே "சம்பளம்" என்ற வார்த்தை தடித்த எழுத்துக்களில் எழுதப்பட்டிருந்தது.//

    சபாஷ்:)))!

    நல்ல கதை சுந்தரா:)!

    ReplyDelete
  2. திருந்தாத உள்ளங்களை
    நல்வழி படுத்த அவர்களின் வழியில் செல்ல வேண்டி உள்ளது.

    சொன்ன விதம் நன்று தோழி

    ReplyDelete
  3. நன்றிகள் திகழ்!

    மிக்க நன்றி ராமலக்ஷ்மி அக்கா!

    ReplyDelete

LinkWithin

Related Posts with Thumbnails