Tuesday, August 31, 2010

ஏங்க, கஷ்டத்தை அரைச்சுக் கொழம்பு வைக்கிறீங்க???


"என்னது, இன்னிக்கி குழம்பு ருசி வித்தியாசமா இருக்கு?" என்று கனியத்தை கேட்க,
"வீட்ல கசகசா இல்லாம இருந்திருக்கும்மா... அதனால, வெறும் தேங்கா மட்டும்தான் அரைச்சு ஊத்தினேன்"ன்னு சொன்னாங்க செல்வி அண்ணி.

"அதான பாத்தேன்...மொதல்லயே சொல்லிருந்தா மூக்காண்டி கடைல வாங்கிட்டு வந்திருப்பேன்ல. இப்ப, உங்கப்பா வந்து கொழம்பு நல்லால்லன்னு வையப்போறாக..." என்று அண்ணியைத் திட்டுனாங்க அத்தை. கசகசான்னா என்னம்மான்னு சின்ன வயசில அம்மாகிட்ட கேட்க, கறிக்குழம்புக்கு வறுத்து வச்சதை எடுத்து கையில குடுத்தாங்க அம்மா. சும்மா சாப்பிட்டாக்கூட நல்லாத்தான் இருந்துச்சு அது.

அப்போ நான் கேட்டமாதிரி, இங்கயும் அதென்ன கசகசா ன்னு ஒருத்தர் ரெண்டுபேர் கேட்டாலும், கடுகைவிடச் சின்னதா, வெள்ளை நிறமா இருக்கிற அந்தப் பலசரக்குப்பொருளை நம்மில் அநேகருக்குத் தெரிஞ்சிருக்கும். கறிக்குழம்பு, குருமாவுக்கெல்லாம் அரைச்சு ஊத்தினா ருசி நல்லாயிருக்கும்னு நம்ம ஊர்ல சொல்லுவாங்க. ஆனா, அதுவே அளவு கொஞ்சம் அதிகமாயிட்டுன்னா கிறக்கமா வரும்னும் கனியத்தை சொல்லக்கேட்டதுண்டு.

ஆனா, இப்படிப்பட்ட கசகசாவோட இன்னொரு பெயரைக்கேட்டா நீங்க ஆடிப்போயிடுவீங்க.பாப்பி சீட்ஸ் ன்னு ஆங்கிலத்தில் நாம சொல்லுகிற இந்தக் கசகசாவோட இன்னொரு செல்லப் பெயர் ஓபியம் (opium). வளைகுடா நாடுகளிலும் இன்னும் சில நாடுகளிலும் தடைசெய்யப்பட்டிருக்கிற ஒரு பயங்கர போதைப்பொருள்.

இங்கே அதெல்லாம் கிடைக்காது என்று ஊரிலிருந்து, அட்டைப்பெட்டிச் சாமான்களுக்குள் அரைக்கிலோவோ கால்கிலோவோ கொண்டு வரும் அம்மணிகளுக்குத்தான் இந்த எச்சரிக்கை. நான் கொண்டு வரமாட்டேன், யாராவது வரும்போது குடுத்துவிடச்சொல்லுவேன் என்பவர்களுக்கும் கூடுதலாக எச்சரிக்கை...வீணாக யாரையும் வம்புல மாட்டி விட்டுராதீங்க.

சில மாதங்களுக்குமுன் இங்கேயுள்ள தினசரி ஒன்றில் கசகசா கொண்டுவந்து பிடிபட்ட ஒருவரைப்பற்றி, பெரிய போதைக் கடத்தல் மன்னன் ரேஞ்சுக்கு எழுதியிருந்தாங்க. அப்படிப் பிடிபடுபவர்களுக்கு, இங்கே குறைந்தது 20 வருடங்கள் சிறைத்தண்டனையோ அல்லது மரண தண்டனையோ கிடைக்கும்னு சொல்றாங்க.

அதனால, கசகசாவும் வேண்டாம் கஷ்டமும் வேண்டாம். இனிமே, ஈசியாக் கிடைக்கிற முந்திரிப்பருப்பை அரைச்சு ஊத்தி, குருமாவோ குழம்போ வச்சு அசத்திருங்க.

எதுக்கும் சந்தேகம்னா இதையும் பாத்துக்கோங்க...

Wednesday, August 25, 2010

தலையணையோ தலையணை!

பட்டுத் தலையணையோ பஞ்சு மெத்தையோ வேண்டாம். கட்டாந்தரையில் படுத்தாலும் சட்டுன்னு தூங்கிருவார் தாத்தா. ஆனா, இலவம் பஞ்சுத் தலையணை, புதையுமளவுக்கு மெத்தை இருந்தாலும் தூக்கம் வராம ராத்திரியில குறுக்கும் நெடுக்குமா நடந்து கிலியைக் கிளப்புவாங்க பாட்டி.

பழகின இடம், பழக்கமான தலையணை,அளவான வெளிச்சமில்லேன்னா எனக்குத் தூக்கம் வராதுன்னு சொல்லி, கல்லூரியிலிருந்து கொடைக்கானல் டூர் போனப்போ எங்களுக்கெல்லாம் காவல்மாதிரி கொட்டக்கொட்ட முழிச்சிட்டே இருந்தா என் தோழி ஒருத்தி.

என் தோழியின் முதல் குழந்தைக்கு ஒண்ணரை வயசிருக்கும்போதே, அவளுக்கு அடுத்த குழந்தையும் பிறந்துவிட்டது. இரண்டாவது குழந்தையைப் பார்த்ததிலிருந்து ஏங்கிப்போன மூத்த குழந்தை, தன்னுடைய தலையணையே கதியென்று ஆகிப்போனது. எப்பவும் அந்தச் சின்னத் தலையணையைக் கிட்டவே வைத்திருக்கும். உறக்கம் வந்தால் தம்பியைத் தூக்கிவைத்திருக்கும் அவங்கம்மாவை ஏக்கமாக ஒரு பார்வை பார்த்துவிட்டு, வாயில் ஒற்றை விரலுடன் அந்தத் தலையணையைக் கட்டிக்கொண்டு உறங்கிப்போகும்.பார்க்கப் பாவமாக இருக்கும். இதைப் பார்த்து, குழந்தையைக் கவனித்துக்கொள்ள ஆளில்லாமலிருந்த என் தோழியும் கண்ணீர் விடுவாள்.



நாளாக நாளாக அந்தத் தலையணை இல்லாமல் தூங்கவேமுடியாது என்று குழந்தை அடம்பிடிக்குமளவுக்கு ஆகிவிட்டது. ஊருக்கு வந்தால் அந்தத் தலையணையின் உறையைமட்டும் மறக்காம எடுத்து வருவாள் அவள். போகிற இடத்திலெல்லாம், அந்த உறைக்குப் பொருந்துவதுமாதிரி மகளுக்கு இன்னொரு சின்னத் தலையணையைத் தயார்செய்து கொடுப்பாள்.

குழந்தைதான் இப்படின்னா, அவங்க தாத்தா அதைவிட மோசமாம். படுக்கும்போது தலைக்கு மொத்தமாக நாலு தலையணை வேணுமாம். அதையும்,அடுக்கிவைப்பதிலும் ஒரு வரிசை வச்சுக்குவாங்களாம். யாராவது மாத்தி அடுக்கிட்டா, மறுபடியும் எழுந்து உட்காந்து அடுக்கிட்டுதான் படுத்துக்குவாங்கன்னு சொல்லுவா. வீட்டுக்கு எத்தனை விருந்தாளிகள் வந்தாலும் யாரு தலையணையில்லாம படுத்தாலும் அவங்களுக்கு நாலு தலையணை வேணும். அதில் அவங்க படுத்திருக்கிறதைப் பார்த்தா படுக்கையில சரிஞ்சு உட்கார்ந்திருக்கிறமாதிரியே இருக்கும்னு சொல்லுவாள் அவள்.

தலையணைக்கும் தூக்கத்துக்கும் சம்பந்தம் இல்லேன்னாலும் தலையணையைக் கண்டாலே படுத்துக்கணும்னு தோன்றுவது எல்லோருக்கும் இயல்புதான். காலுக்கு ஒரு தலையணை கைக்கு ஒரு தலையணைகூட வச்சுக்குவாங்க சிலர்.

உடம்பில் ஏற்படும் வலிகளைத் தீர்க்க, தலையணைகள் ரொம்பவே உதவுதுன்னு சொல்லலாம். தோள்பட்டை வலியிருக்கிறவங்க, எந்தத் தோள்பட்டை வலிக்கிறதோ அந்தப்பக்கம் மெல்லிய தலையணையையோ, அல்லது மடித்த போர்வையொன்றையோ கைக்குக்கீழே வச்சுக்கிட்டா தோள்பட்டை வலிகுறையும்னு அனுபவப்பட்டவங்க சொல்லுவாங்க.

அதேமாதிரி கழுத்து வலியுள்ளவங்க அதிகமான உயரமில்லாத தலையணையை வச்சுக்கலாம். அதிலும் கீழேயிருக்கிறமாதிரியான தலையணை, கழுத்துவலியுள்ளவங்களுக்கு ரொம்ப நல்லது. இந்தத் தலையணையில், நேராகப் படுக்கவும் ஒருக்களித்துப்படுக்கவும் இரண்டு பக்கமும் வித்தியாசமான உயரத்தோடு இருக்கும்.




இது நம்ம ஊரில் கிடைக்குதான்னு தெரியல, ஆனா இங்கெல்லாம் கிடைக்கிறது.

முதுகுவலி, இடுப்புவலியிருக்கிறவங்க, காலுக்கும் ஒரு தலையணை வச்சுக்கலாம். காலுக்கடியில் தலையணை வைத்துக்கொள்வதால, முதுக்குப்பகுதி நன்றாக படுக்கையில் பதியும். அதனால் முதுகுவலியும் குறையும் என்கிறார்கள்.



நாம விதவிதமாத் தலையணையைப் பயன்படுத்துறமாதிரி, விளையாட்டாகத் தலையணையால் ஒருத்தரை ஒருத்தர் அடிச்சுக்கிறதைத் திருவிழாவாகவே கொண்டாடுறாங்க சிலநாட்டினர். ஏப்ரல் மாதம் மூன்றாம் நாள், இந்தத் தலையணைச் சண்டைத் திருவிழாவைக் கொண்டாடுகிறார்களாம்.

இந்தத்திருவிழாவைப்பற்றி இன்னும் தெரிஞ்சுக்கணும்ன்னா
இங்கே
பாருங்க.



கடைசியா ஒரு விஷயம்...

பள்ளியில் படிக்கிறப்ப தலையில்லா முண்டம் ஒண்ணு ஊருக்குள்ள உலாவுதுன்னு கதைகட்டிவிட்டிருந்தாங்க. எல்லா வீட்டு வாசலிலும் வேப்பிலைக் கொத்துகள் சொருகியிருக்க, எல்லாரும் 'அங்கே வந்தது, இங்கே வந்தது' ன்னு அதைப்பத்தியே பேசினாங்க.

எங்க வீட்டுக்கு விருந்துக்கு வந்திருந்த என் தங்கை ராத்திரி தூக்கத்தில் என்னை எழுப்பி, "அக்கா, இப்ப, தலையில்லாமுண்டம் நம்ம வீட்டுக்கு வந்தா, நம்மகிட்ட எதை வேணும்னாலும் பிடுங்கிக்கலாம்.ஆனா, ஒண்ணே ஒண்ணை மட்டும் அதால பயன்படுத்தவேமுடியாது. அது என்னன்னு சொல்லு?" என்று கேட்டு, தலையணைன்னு பதிலையும் சொல்லி, என் கிட்ட தலையணையாலேயே அடியும் வாங்கினா.
இன்னிக்கி நினைச்சாலும் சிரிப்பு வருது :)

LinkWithin

Related Posts with Thumbnails